Joseph Ognibene

Jósef Ognibene er fæddur og uppalinn í hinni amerísku borg englanna, Los Angeles, þar sem hann lærði hornleik og hljómsveitarstjórn við Pomona College. Hann stundaði framhaldsnám í Þýskalandi hjá hinum heimsþekkta einleikara Hermann Baumann og vann á námsárunum til verðlauna í alþjóðlegu keppninni Vor í Prag. Jósef kom til Íslands árið 1981 og hefur síðan gegnt stöðu fyrsta hornleikara í Sinfóníuhljómsveit Íslands. Hann er jafnframt stofnmeðlimur Blásarakvintetts Reykjavíkur og hefur bæði með S.Í. og B.R. gefið út fjölda hljóðritana og komið fram víða um heim. Hann spilar einnig reglulega með Kammersveit Reykjavíkur og Íslensku Operunni.

Jósef Ognibene hefur kennt við Tónlistarskóla í Reykjavík í meira en aldarfjórðung og tekið þar þátt í að koma á fót nokkrum kynslóðum íslenskra málmblásara. Sem listrænn stjórnandi Hornleikararfélags Íslands tók hann mikilvægan þátt í skipulagningu þings norænna hornleikara sem var haldið á Íslandi árið 2008. Jósef hefur flutt og tekið upp mörg einleiksverk með Sinfóníuhljómsveit Íslands og kemur oft fram á þingum alþjóða hornfélagsins “International Horn Society” þar sem hann gegnir nú embætti varaforseta.

← Til baka í kennarayfirlit