Hallfríður Ólafsdóttir

Hallfríður Ólafsdóttir er 1. flautuleikari Sinfóníuhljómsveitar Íslands. Hún hefur verið fastráðin við hljómsveitina frá janúar 1997, fyrst sem pikkolóleikari og uppfærslumaður en sem leiðandi flautuleikari frá 1999. Hallfríður er einnig kennari við Tónlistarskólann í Reykjavík og flautuleikari kammerhópsins Camerarctica.

Hallfríður lauk bæði einleikaraprófi og kennaraprófi frá Tónlistarskólanum í Reykjavík vorið 1988 og var kennari hennar þar Bernharður Wilkinson. Hún fór þá utan til náms og var fyrst við nám hjá Trevor Wye og Kate Hill í Royal Northern College of Music í Manchester, og lauk þaðan Postgraduate Diploma eftir einn vetur. Hún komst þá að hjá William Bennett við Royal Academy of Music í Lundúnum, ein þriggja nemenda úr um hundrað manna hópi, og hlaut eftir tveggja ára nám Diploma of Advanced Studies, auk þess að hljóta styrk frá skólanum og önnur verðlaun í keppni tréblástursnemenda.
Hallfríður lagði að lokum stund á franska tónlist hjá Alain Marion í París veturinn 1991-92 en kom þá alkomin heim og hefur síðan verið starfandi flautuleikari og kennari í Reykjavík.

Hallfríður hefur ásamt starfi sínu hjá Sinfóníuhljómsveitinni leikið einleikskonserta, m.a. með Sinfóníuhljómsveit Íslands, og lagt stund á kammertónlist, fyrst og fremst með Camerarctica, auk þess að sinna uppfræðslu verðandi flautuleikara við Tónlistarskólann í Reykjavík. Hallfríður hefur hljóðritað og gefið út á geisladiskum flautukvartetta eftir W.A. Mozart og ýmis íslensk kammerverk.
Árið 2002 var Hallfríði veitt heiðursnafnbótin Honorary Associate of the Royal Academy of Music (HonARAM) sem veitist þeim fyrrum nemendum RAM sem notið hafa velgengni í starfi. Einnig hefur Royal Academy leitað eftir Hallfríði sem gestakennara við flautudeildina. Árið 2003 hlaut Hallfríður titilinn Bæjarlistamaður Garðabæjar.

Hallfríður er höfundur metsölubókanna Maxímús Músíkús heimsækir hljómsveitina sem gefin var út í mars 2008, Maxímús Músíkús trítlar í tónlistarskólann sem kom út í apríl 2010 og Maxímús Músíkús bjargar ballettinum en nýja sagan kom út í maí 2012.

← Til baka í kennarayfirlit