Áshildur Haraldsdóttir

Áshildur Haraldsdóttir er fædd í Reykjavík árið 1965. Hún hóf að læra á flautu níu ára gömul og tók burtfararpróf frá Tónlistarskólanum í Reykjavík sautján ára. Haustið 1983 hélt Áshildur til Bandaríkjanna til framhaldsnáms. Hún lauk “Bachelor Of  Music” – prófi með hæstu einkun í hljóðfæraleik frá The New England Conservatory Of Music, 1986 og “Master Of  Music” – prófi frá The Juilliard School í New York, 1988. Hún varð fyrsti flautuleikarinn til að komast inn í Konservatoríið í París í nám í svokölluðum “Cycle de Perfectionnement”, en því námi lauk árið 1992.

Hún hefur unnið til fyrstu verðlauna í “The New England Conservatory Commencement Competition” (1986), “The Annual James Pappoutsakis Memorial Fund Competition” (1986) og “The International Young Concerts Artists Competition of Royal Tunbridge Wells” (1989).  Hún hefur einnig hlotið þriðju verðlaun á alþjóðlegu flautukeppninni “Flute d´Or” í Frakklandi (1992).  Hún hlaut önnur verðlaun í alþjóðlegu flautukeppninni “Syrinx” á Ítalíu (1995) auk fyrstu verðlauna fyrir besta flutning á nútímaverki. Áshildur var einnig valin fulltrúi Íslands á Tvíæring ungra norrænna einleikara 1988.

Áshildur Haraldsdóttir hefur meðal annars komið fram sem einleikari með Indian Hill Chamber Orchestra (1987), Kammersveit Reykjavíkur (1990 og 2001), Sinfóníuhljómsveit Íslands (1988, 1991, 1994 ,1997 og 2000), Sinfóníuhljómsveit áhugamanna (1999 og 2000), Oskarshamn Symphony Orchestra (1990), Camerata Roman (1992 og 1993), Umea Symphony Orchestra (1996), Filharmonica del Bajio (1990), London Region Symphonia (1989, 1991 og 1992), KwaZulu-Natal Philharmonic (1999), Musica Vitae (2002), Il Solisti Veneti (2004) og Norbottons Kammarorchester (2005) og Royal Chamber Orchestra Tokyo (2007).

Áshildur er einnig virkur kammermúsíkkant og hefur komið frá á tónleikum í víðsvegar um Evrópu og Japan með KaSa-hópnum og fór nýverið í tónleikaferð um Kína með RTÉ Vanbrugh-kvartettnum. Hún hefur einnig haldið fjölda einleikstónleika í sölum á borð við Lincoln Center og Cami Hall, New York og Barbican Center og The Purcell Room, London. Áshildur hefur komið fram í útvarpi og sjónvarpi í Bandaríkjunum, á öllum Norðurlöndunum og í Frakklandi og leikið reglulega í BBC í Englandi. Þess má geta að Áshildur hefur margsinnis frumflutt íslensk verk heima og erlendis og eru íslensk verk mjög oft á efnisskrá hennar.

Áshildur lék með Die Deutsche Kammerphilharmonie árið 1992 til 1993 og og var meðlimur kammerhljómsveitarinnar L´Orchestre Symphonique Français frá árinu 1995 til 1997 en er nú fastráðin hjá Sinfóníuhljómsveit Íslands.

Áshildur hefur hljóðritað einleiks-geisladiskana  “Joueuse de Flûte“, ”Undine“, ”Concertos by C.Ph.E. Bach, Benda and Haydn“ og disk þar sem Áshildur leikur Partitu Gösta Nystroems með sænsku kammersveitinni “Musica Vitae”  fyrir sænska útgáfufyrirtækið Intim Musik og „Miniatures“ með meðleik Selmu Guðmundsdóttur fyrir íslenska útgáfufyrirtækið Spor. Áshildur hefur einnig leikið kammermúsík inn á diska fyrir ITM og franska útgáfufyrirtækið Timpani, þar sem hún lék með tónlistarmönnunum Alain Marion, Michel Arrignon og Pascal Devoyon. „Tónamínútur“, tvöfaldur geisladiskur með flaututónlist Atla Heimis Sveinssonar, kom út haustið 2006 hjá útgáfufyrirtækinu Smekkleysu og var tilnefndur til Íslensku tónlistarverðlaunanna.

Árið 2010 var Áshildur sæmd heiðursmerki hinnar íslensku fálkaorðu  fyrir störf á vettvangi íslenskrar tónlistar.

← Til baka í kennarayfirlit